Kuya 25/03/2026, 2:25 PM
Mu gihe u Rwanda rutegura kwakira irushanwa rikomeye ry’umupira w’amaguru ku rwego mpuzamahanga, Perezida w’Ishyirahamwe ry’umupira w’amaguru mu Rwanda (FERWAFA), Shema Fabrice, yatangaje ko intego nyamukuru ari uko igikombe kizaguma mu Rwanda. Ibi yabitangaje mbere y’uko irushanwa rya FIFA Series 2026 ritangira i Kigali kuwa Kane, tariki ya 26 Werurwe 2026, aho abakinnyi b’ingeri zose bazaba bahatana ku rwego rwo hejuru.
Shema Fabrice yabwiye abanyamakuru ko iri rushanwa ritazaba gusa amahirwe yo kwerekana impano z’abakinnyi b’Abanyarwanda, ahubwo rikazafasha igihugu kwiyamamaza ku rwego mpuzamahanga binyuze mu mupira w’amaguru, ibintu bishobora kuzamura isura y’u Rwanda mu ruhando rw’ibihugu bikomeye muri siporo. Ati:
“Uyu munsi, turi gukoresha umupira w’amaguru nk’uburyo bwo kumenyekanisha igihugu cyacu. Kuba dufite abakinnyi bashobora gukina mu makipe akomeye ku Isi, nk’ayo mu Bwongereza, byongera agaciro k’iki gikorwa.”
Perezida wa FERWAFA yagaragaje ko iri rushanwa ari amahirwe akomeye ku rubyiruko rwo mu Rwanda, cyane cyane ku bakinnyi bato bashaka kwigaragaza. Ati:
“Dushaka ko urubyiruko rwacu rubona amahirwe yo kwigaragaza. Kugira umukinnyi ukina mu ikipe ikomeye ku Isi byongera agaciro k’umupira wacu ndetse n’igihugu muri rusange.”
Iri rushanwa ritezweho gutanga inyungu nyinshi ku bukungu bw’igihugu. Shema Fabrice yavuze ko binyuze mu bukerarugendo, ubucuruzi ndetse no kwakira amakipe atandukanye, u Rwanda ruzinjiza amafaranga menshi. Yagize ati:
“Amakipe arindwi yamaze kugera mu gihugu mu cyumweru kimwe. Ayo makipe yose acumbitse mu mahoteli atandukanye, kandi ari kubona serivisi nziza. Hari n’abifuza gusura u Rwanda, ibi byose bikagira uruhare mu kuzamura ubukungu.”
Yongeyeho ko bamwe mu banyamahanga bitabiriye iri rushanwa ari ubwa mbere bageze muri Afurika, bigatanga amahirwe yo kumenyekanisha igihugu no kugaragaza umuco nyarwanda. Ati:
“Bamwe mu bakinnyi n’abatoza bavuga ko ari bwo bwa mbere bageze muri Afurika. Ni amahirwe kuri bo yo kumenya u Rwanda, kandi natwe tukabasha kwiyereka Isi.”
Perezida wa FERWAFA yashimiye kandi Leta y’u Rwanda ku ruhare rwayo mu guteza imbere ibikorwa by’umupira w’amaguru, ibintu byatumye bishoboka kwakira amarushanwa nk’aya ku rwego rwo hejuru. Yagize ati:
“Ntidushobora kwakira amarushanwa nk’aya hatariho ibikorwaremezo byiza. Turashimira Leta y’u Rwanda yakomeje kubishyiramo imbaraga, kandi dufite gahunda yo gukomeza kubiteza imbere.”
Mu kiganiro cye, Shema Fabrice yasobanuye ko u Rwanda ruteganya kwakira amarushanwa manini kurushaho mu gihe kiri imbere, aho intego ari ukwagura imikoranire n’ibindi bihugu no kongera ubukana bw’imikino mpuzamahanga mu Rwanda. Ati:
“Dutangiye n’amarushanwa arimo amakipe umunani mu cyumweru kimwe, ariko intego ni ukwagura tukagera ku marushanwa akomeye kurushaho mu myaka iri imbere.”
Perezida wa FERWAFA yagaragaje icyizere gikomeye ku ikipe y’u Rwanda. Yavuze ko intego ari uko igikombe kizaguma mu Rwanda, ashimangira ko ikipe y’igihugu izitwara neza kugira ngo ibyo byose bishoboke. Ati:
“Iki gikombe kirasa n’icy’Igikombe cy’Isi. Intego yacu ni uko kizaguma mu Rwanda. Turifuza ko ikipe yacu izitwara neza ikacyegukana.”
Shema Fabrice yashoje ashimangira ko iri rushanwa ritari gusa ku mupira w’amaguru, ahubwo ari n’amahirwe yo guteza imbere ubushobozi bw’Abanyarwanda mu gutegura ibikorwa mpuzamahanga, bityo bikazamura isura y’igihugu ku rwego mpuzamahanga.
Abakunzi b’umupira w’amaguru mu Rwanda bakomeje kwitegura kureba irushanwa, bategereje kureba uko ikipe y’igihugu izitwara ndetse n’ingaruka nziza iri rushanwa rizagira ku bukungu n’iterambere ry’imikino mu Rwanda. Uyu ni umwanya mwiza wo kugaragaza ko u Rwanda rwiteguye kwakira amarushanwa mpuzamahanga kandi ko intego nyamukuru ari ukugumana ibikombe imbere mu gihugu, bityo bigateza imbere umupira w’amaguru n’imyidagaduro mu buryo burambye.
0 Comments