Mu gihe u Rwanda n’Isi muri rusange bibuka ku nshuro ya 32 Jenoside yakorewe Abatutsi mu 1994, umuhanzikazi Butera Knowless yatanze ubutumwa bukomeye bugamije kwibutsa by’umwihariko urubyiruko ko ari rwo rufite uruhare runini mu kubaka ejo hazaza h’igihugu.
Mu kiganiro yagiranye n’itangazamakuru, yavuze ko Kwibuka bidakwiye kugarukira ku mateka gusa, ahubwo bikwiye kujyana no kwiyubaka no guharanira ejo hazaza heza.
Yagize ati:
"Twibuke, twiyubaka, twiyemeze gukomeza kubaho dufite icyizere n’imbaraga zo kubaka u Rwanda ruzira ivangura n’urwango."
Knowless yashimangiye ko buri Munyarwanda wese afite inshingano yo kurinda amateka no kuyigiraho, kugira ngo ibyabaye bitazongera kubaho ukundi.
Ku bijyanye n’urubyiruko, yavuze ko ari rwo rufite inshingano zikomeye kurusha abandi mu gusigasira amateka no kurwanya ingengabitekerezo ya Jenoside.
Ati:
"Urubyiruko ni rwo musingi w’ejo hazaza h’u Rwanda. Twese duharanire kubaka igihugu kirangwa n’ubumwe, ukuri n’urukundo."
Yakomeje asaba urubyiruko kudaceceka, ahubwo gutinyuka kuvuguruza ibibi n’abagoreka amateka, ndetse no kurwanya amagambo n’ibitekerezo byose bishobora gusubiza igihugu inyuma.
👉 Ubutumwa bwe bwiyongera ku bw’abandi bahanzi n’abanyabigwi bakomeje gukangurira Abanyarwanda gukomeza kubungabunga ubumwe n’amahoro.
📌 Isomo rikuru: Kwibuka si ukwibuka gusa, ni no kwiyubaka no kurinda ejo hazaza.
0 Comments